ARRAUN ESKOLA
Arrakasta txikitatik eraikiz
Bizitzarako nahiz senior mailako nesken zein mutil taldeak hornitzeko arraunlari lehiakorrak heztea eta haztea.
Arraun eskolako partaideek heziketa bide berri bat izateko aukera eduki dezaten nahi dugu eta ezinbestekoa izango da gure eskolan balore batzuk transmititzea eta horiek barneratzen laguntzea.
ERRESPETUA
KONPROMEZUA
KONFIANTZA
ERANTZUNKIZUNA
PROFESIONALTASUNA
TOLERANTZIA
EKITATEA
SOLIDARITATEA
ZINTZOTASUNA
LEHIAKORTASUNA
ORIOTARTASUNA
PARTAIDE IZATEA
Urte asko dira, ziur aski tradizioak horrela bultzatu gaituelako, Orio Arraunketa Elkarteak harrobiari garrantzia handia ematen diola. Azken finean, Orio gaur egun dena izatera iritsi da, herri-sentimendu hori barneratuta duten arraunlariak arraunari tiraka guztia ematen jardun direlako, gaztetxoen mailatik hasi eta heldu izatera iritsi arte.
Arraun eskolaren helburuetako bat, senior taldeetarako arraunlariak hazi nahiz heztea da, horretarako, etengabeko prestakuntzan jarraitzeko bideak ireki behar zaizkie. Hori horrela, alebinetan hasi eta gaztetxoetan amaitzen den zikloan, arraunlari bakoitzak parte hartzea aktiboa du egiten diren ekintza guztietan. Heziketa eta hazkuntza esanguratsuak eta oparoak ezin dira eman arraunlari gaztetxoengan, bidelagun diren teknikariak ez baldin badira goi mailakoak eta erabiltzen den materiala ez bada puntakoa.
Gaur egungo gizarteko edozein esparrutan lehia bizia nabaritzen da. Horregatik, urtean zehar egiten diren lehia ezberdinak arraun eskolako partaideak lehian hezteko aukera bezala hartu nahi ditugu. Ez Gipuzkoa edo Euskal Herri mailakoak bakarrik, estatu eta inguruko estatuetakoak ere bai.
Norabidea
Aulki mugikorra gure norabide eta jomugan dago. Gaztetxoen hazkuntza hobeto bermatzen du eta trainerura salto egiteko eman beharreko prozesua da. Gizarterako eraginkorrak diren gazteak hazi eta hezi nahi ditugu.
Gorputza eta mugimendua dira arraun eskolak egiten duen lan hezitzailearen oinarrizko ardatzak. Gorputz-hezkuntza eta mugimendua lantzen dira, dohain fisikoak eta motorrak hobetzeko, eta aldi berean, ohitura osasungarrien garrantzia finkatzen ditugu. Konpetentzia afektiboak eta harremanekin lotuak ere lantzen ditugu, gizartean bizitzeko beharrezkoak direnak.
